2026 жылғы 1 қаңтардан бастап паспорт, жүргізуші куәлігі және басқа да құжаттарды рәсімдеу қымбаттайды. Себебі айлық есептік көрсеткіш (АЕК) 3 932 теңгеден 4 325 теңгеге өседі. Бұл көрсеткіш 2026–2028 жылдарға арналған мемлекеттік бюджетте белгіленген. Аталған құжатқа кеше Қазақстан Президенті Қасым-Жомарт Тоқаев қол қойды.

Жаңа АЕК мөлшеріне байланысты келесі жылы құжаттарды рәсімдеуге арналған мемлекеттік баж да өседі:

• 16 жасқа дейінгі балаларға арналған паспорт (24 бет) – 17 300 теңге (4 АЕК). 2025 жылы – 15 728 теңге.

• Қарапайым паспорт (36 бет) – 34 600 теңге (8 АЕК). 2025 жылы – 31 456 теңге.

• 48 беттік паспорт – 51 900 теңге (12 АЕК). 2025 жылы – 47 184 теңге.

• Жеке куәлік – 865 теңге (0,2 АЕК). 2025 жылы – 786 теңге.

Егер жеке куәлік бір жылда екі және одан көп рет жоғалса, 1 АЕК (4 325 теңге) төлеу қажет болады.

Жүргізуші куәлігін рәсімдеу 5 406 теңге (1,25 АЕК) болады.

Қаңтардан бастап некені тіркеу құны да өседі – 1 АЕК, яғни 4 325 теңге.

Ал ажырасқысы келетіндер үшін мемлекеттік баж 8 650 теңгеге (2 АЕК) дейін өседі. 2025 жылы бұл төлем 7 864 теңге болған. Яғни, неке қиюдан екі есе қымбат.

Туу туралы куәлікті алғашқы рет алу бұрынғыдай тегін, алайда оны қайта рәсімдеу қажет болса, 0,5 АЕК – 2 163 теңге төлеу керек.

Кейбір азаматтар құжаттарды ақысыз ала алады. Оларға:

• ел қаһармандары және жоғары мемлекеттік наградалардың иегерлері;

• құрметті атағы бар көпбалалы аналар;

• соғыс ардагерлері және жауынгерлік іс-қимылдарға қатысқандар;

• мүгедектігі бар адамдар және мүгедектігі бар баланың ата-анасы;

• әлеуметтік мекемелерде тұратын қарттар;

• жетім балалар және толық мемлекеттік қамтамасызудағы балалар;

• Чернобыль апатынан зардап шеккен азаматтар жатады.

8 желтоқсанда Президент Қасым-Жомарт Тоқаев республикалық бюджет туралы заңға қол қойды. Бұл – елдің негізгі қаржылық құжаты. Онда мемлекет 2026–2028 жылдары қанша табыс табатыны және қанша қаржы жұмсайтыны көрсетілген.