Қазақстанда жұмыссыз қалған азаматтарға әлеуметтік көмек төлеу жалғасуда. Еңбек және халықты әлеуметтік қорғау министрлігі соңғы деректерді жариялады.

Жыл басынан бері Мемлекеттік әлеуметтік сақтандыру қорынан жұмыссыздық бойынша әлеуметтік төлемді 331,7 мың адам алды. Олардың ішінде 289,8 мыңы 2025 жылы жұмыссыз деп танылды. Төленген жалпы қаражат көлемі 118,5 млрд теңгені құрады.

Әлеуметтік төлем бір айдан алты айға дейінгі мерзімге тағайындалады. Оның мөлшері міндетті әлеуметтік сақтандыру жүйесіне қатысу ұзақтығы мен соңғы екі жылдағы табысқа байланысты және жоғалтылған жалақының 45%-ына дейін жетуі мүмкін.

Төлем алу үшін eGov.kz порталы немесе Электрондық еңбек биржасы (enbek.kz) арқылы жұмыс іздейтін адам ретінде тіркелу қажет. Қолайлы бос жұмыс орындары болмаса, жұмыссыз мәртебесі қашықтан үш жұмыс күні ішінде беріледі.

Бұрыннан жұмыссыз ретінде есепте тұрған азаматтарға министрліктің жүйесі төлемді проактивті форматта рәсімдеуге арналған SMS-хабарлама жібереді. Келісім растағаннан кейін жәрдемақы автоматты түрде тағайындалады.