Астана. Dalamedia — Бүгін Сенат депутаттары Қазақстанда ЛГБТ-ны насихаттауға тыйым салуды көздейтін заңнамалық түзетулерді екінші оқылымда қабылдады. 

Түзетулер архив ісі туралы заң жобасына енгізіліп отыр.

Аталмыш құжат Еңбек кодексіне және тағы 12 заңға өзгерістер мен толықтырулар енгізуді қарастырады. Заңның негізгі мақсаты – балалардың денсаулығы мен дамуына зиян келтіретін ақпараттан қорғау.

Заң мәтінінде жария кеңістікте, масс-медиа, телекоммуникация желілері мен онлайн платформаларда педофилияны және дәстүрлі емес сексуалдық бағдарды насихаттайтын ақпараттарды таратуға тыйым салынатыны көрсетілген.

Түзетулер күшіне енген жағдайда әлеуметтік желілерде дәстүрлі емес жыныстық қатынастарды насихаттауға жол берілмейді.

Сонымен қатар «дәстүрлі емес жыныстық бағдарды насихаттау» ұғымына нақты анықтама беріліп, оның БАҚ пен интернетте таралуына шектеу қойылады.

Қазіргі уақытта ЛГБТ тақырыбындағы ашық көріністерді фильмдерден алып тастау мәселесі де талқыланып жатыр. Бұдан бөлек, жаңа нормалардың тойлар мен корпоративтік шаралар секілді жаппай іс-шараларға да қатысы болуы мүмкін екені айтылған.