Астана. Dalamedia — Сенат «Құқықбұзушылық профилактикасы туралы» заңға және оған ілеспе екі құжатқа енгізілген өзгерістерді екінші оқылымда қабылдады. Құжат Мемлекет басшысының қол қоюына жолданды

Жаңа заң құқықбұзушылықтың алдын алу тетіктерін күшейтіп, уәкілетті органдар арасындағы үйлестіруді арттыруды көздейді. 

Құжатта ескерту, қорғау талаптары, айыппұл салу және құқықбұзушылықтың себептерін жою шаралары қамтылған.

Сондай-ақ алғаш рет виктимологиялық профилактика ұғымы енгізілді.

Заңда балалардың құқықтарын қорғау, тұрмыстық зорлық-зомбылықтың алдын алу және қайталанатын құқық бұзушылықтарды болдырмау мәселелеріне басымдық берілген. Әкімдерге балалардың құқықтарын қорғау жөніндегі өңірлік органдар құру құзыреті берілді.

Сонымен бірге электр самокаттарын пайдалануға қатысты жаңа талаптар енгізіледі. Енді оларды пайдаланушылар мен жалға беру қызметтері сақтандыру жауапкершілігін көтеріп, құрылғылар тіркеуге алынады.

Заңның басты мақсаты — қоғамдық тәртіпті нығайтып, азаматтардың құқықтары мен бостандықтарын қорғау.