Енді мектеп оқушылары сабақ барысында смартфон пайдалана алмайды. Елімізде педагог мәртебесі мен білім беру мәселелері жөніндегі заң жобасына өзгеріс енгізу қарастырылуда.

Бүгінде оқушыларға тек үзіліс кезінде телефон қолдануға рұқсат етілген. Әр мектеп әкімшілігі талапты өздері белгілейді. Заң аясында мұғалімнің рұқсатымен сабақ барысында қолдануға да болады.

Депутаттар заң жобасындағы қағидатты толық өзгертіп, смартфон пайдалану мәселесін Оқу-ағарту министрлігі немесе аумақтық білім басқармалары секілді білім беру саласындағы уәкілетті органдарға тапсыруды ұсынды. Депутаттар оқушылардың құқығы мен міндеттерін реттейтін 47-бапқа мынадай редакция енгізуді ұсынды:

«Орта білім беру ұйымдарында оқу процесі кезінде оқушыларға ұялы телефонды (смартфонды) қолдануға болмайды. Тек білім беру саласындағы уәкілетті орган бекіткен арнайы ережеде көрсетілген ерекше жағдайларда пайдалануға рұқсат етіледі».

Заң жобасы оқушыларды кибербуллинг пен зиянды контенттен қорғауға, мектептегі тәртіп пен қауіпсіздікті арттыруға бағытталған. Еске сала кетейік, сабақ барысында смартфон пайдалануға заңдық тыйым 2024 жылдың басында енгізілген еді.