Шымкент қаласындағы 83 мектепте мұғалімдердің апталық жүктемесі заңда белгіленген нормадан асып кеткені анықталды. Кейбір педагогтер 40–50 сағат, тіпті 75 сағатқа дейін жұмыс істеген.

Қала әкімінің орынбасары Сәрсен Құранбектің айтуынша, Sana ақпараттық компонентін енгізу кезінде 1 286 педагогтің жүктемесі шектен тыс екені белгілі болған. Еңбек кодексіне сәйкес, мұғалімнің нормативтік жүктемесі – 16 сағат, ал бір жарым ставкамен – 24 сағаттан аспауы тиіс.

Анықталған деректерге сай, бірқатар мектепте бір педагог 60 сағатқа дейін, яғни төрт штаттық бірліктің жұмысын қатар атқарған. Сонымен бірге, кей ұйымдарда бір қызметкер бір мезгілде екі әкімшілік лауазымды (оқу ісі және тәрбие ісі жөніндегі орынбасар) қоса атқарған жағдайлар тіркелген.

Мәселе Оқу-ағарту министрлігі, прокуратура және еңбек инспекциясымен талқыланып, педагог жүктемесі 24 сағаттан аспауы тиіс деген талап нақты бекітілді. Осыған байланысты мектеп директорларына 1 қаңтардан бастап жүктемені заңға сай реттеу тапсырылды.

Айта кетейік, штаттық кесте мен тарификациялық бірліктер жылына екі рет — 1 қаңтар және 1 қыркүйекте бекітіледі.