Павлодар облысының жас педагогы Игорь Гноевой әлеуметтік желілерде танымал мұғалімдердің біріне айналды. Бастауыш сынып мұғалімі татуировкалары, заманауи бейнесі және оқытудағы ерекше тәсілдері арқылы балалардың қызығушылығын арттырып, қоғамдағы мұғалім туралы қалыптасқан көзқарасты өзгертіп жүр. 

Гноевойдың айтуынша, ол бастапқыда аудармашы мамандығына түскен, алайда кейін бастауыш сынып мұғалімі мамандығын таңдап, өз мектебінде қызметке келген. Алғашқы жылдары қиындық көп болғанмен, тәжірибелі әріптестерінің қолдауымен педагогикаға шынайы қызығушылық танытқан.

Игорь Гноевой әлеуметтік желілерде логикалық тапсырмалар, түсінікті әдістер, интерактивті сабақтарымен бөліседі. Оқушыларды викторина, сұрақ-жауап, ойын элементтері арқылы баурап, сабақта мультимедиа құралдарын белсенді қолданады.

Педагогтың ең танымал видеоларының бірі – логикалық жұмбақ тақырыбындағы қысқа ролик. Бүгінде оның TikTok-тағы кейбір видеолары 7 миллионға жуық қаралым жинаған, ал жазылушылары Қазақстанмен қатар Ресей, Беларусь және Еуропа елдерінен.

Гноевой блогында білім беру мәселелерін қозғап, буллингпен күрес, инклюзивтілік, бала тәрбиесі және мұғалімдердің жүктемесі туралы пікірін ашық айтады. Оның айтуынша, мектеп тек білім беретін орта емес, ең алдымен адамгершілікке тәрбиелейтін орын болуы тиіс.

Педагог қазіргі мектептегі басты мәселенің бірі — артық есеп беру екенін атап, мұғалімдерге жүктеменің азайтылуы қажет екенін айтады.

Игорь Гноевой өз жұмысында басты мақсат – баланы білімді, ашық, сенімді етіп тәрбиелеу екенін атап өтеді.