Қазақстанның қорғаныс саласына арналған ғылыми жобаларды іске асыруға шамамен 2 миллиард теңге бөлінген. 2018–2025 жылдар аралығында Ұлттық қорғаныс университетінде жалпы құны 1,9 миллиард теңгені құрайтын 22 ғылыми жоба әзірленген,-деп хабарлайды «Dalamedia» ақпараттық порталы.

Жобалардың қатарында «Шағала» атты барлау мақсатындағы ұшқышсыз ұшу аппараты (дрон), инженерлік әскерлерге арналған жетілдірілген минасыздандыру құрылғысы және өзге де техникалық әзірлемелер бар. Сонымен бірге әскери барлау мен соққы беру жүйелерін дамыту бағытында бірқатар зерттеу жұмыстары жүргізіліп, оларды қолдану жөнінде ұсыныстар әзірленген.

Университет ұжымы бұл бағыттағы жұмыстарды жүйелі түрде жалғастырып, ғылыми-зерттеу және инновациялық әлеуетті арттыруға басымдық беріп келеді. Оқу орнында қазіргі таңда 5 ғылым докторы, 24 ғылым кандидаты, 57 философия докторы (PhD) және 1 бейіндік доктор еңбек етеді.

«Шағала» дронының тәжірибелік үлгісі бағдарламалық-аппараттық байланыс жүйесімен жабдықталған. Сондай-ақ оның байланыс арнасы қорғалған жеке криптографиялық хаттама арқылы қорғалған. Қорғаныс министрлігінің мәліметінше, бұл бағыттағы жұмыстар қазіргі заманғы әскери қақтығыстарда ұшқышсыз аппараттарды тиімді қолдану қажеттілігінен туындаған.

Қорғаныс министрінің орынбасары генерал-лейтенант Тимур Дәндібаевтың айтуынша, мұндай техникаларды әзірлеуде ел әскерінің қажеттілігі мен жергілікті географиялық ерекшеліктер ескерілуі тиіс.

Сынақ барысында дронның төмен температураға төзімді жаңа қуат көзі де тексерілген. Бұл аккумуляторды университет мамандары әзірлеген.

Әскери ғылыми-зерттеу орталығының бастығы, полковник Қуандық Ақшолақовтың айтуынша, «Шағала» шетелдік аналогтардан кем түспейді, керісінше бірқатар артықшылықтарға ие.

Оның дерегінше, дронның ұшу қашықтығы 30 шақырымға дейін жетеді, ауада 2,5 сағатқа дейін тұрақты ұша алады. Сонымен қатар ол секундына 14 метрге дейінгі жел екпінінде де тұрақтылығын сақтайды. Жоба болашақта взвод деңгейінен батальонға дейінгі бөлімшелердің қару-жарақ құрамына енгізілмек.

Министрлік бұған дейін ұшқышсыз аппараттарды құрастыру уақыты олардың түрі мен маманның тәжірибесіне байланысты екенін де атап өткен. Тәжірибелі маман үшін квадрокоптер типіндегі дронды құрастыру 3–6 сағатты алса, біліктілігі төмен адамға бұл процесс 1–2 тәулікке дейін созылуы мүмкін.