Қазақстанда криптовалютаны заңсыз айырбастау арқылы жұмыс істеген ірі көлеңкелі схема жойылып, 10 миллион доллардан астам қаржы тәркіленді, — деп хабарлайды «Dalamedia» ақпараттық порталы.

Қаржылық мониторинг агенттігінің мәліметінше, жалпы айналымы 224 миллион долларға жеткен RAKS Exchange атты күмәнді платформа арқылы есірткі саудасы мен интернет-алаяқтықтан түскен қаражат заңсыз жолмен жылыстатылған.

Ведомство дерегіне сүйенсек, аталған сервис цифрлық активтерді қолма-қол ақшаға айналдыру және қылмыстық кірістерді “тазарту” үшін пайдаланылған. Бұл схемаға Қазақстанмен қатар Ресей, Украина және Молдова аумағында жұмыс істеген 200-ден астам есірткі интернет-дүкені тартылғаны анықталған.

Тергеу барысында Қаржылық мониторинг агенттігі “Follow the Money” әдісін қолданған. Соның нәтижесінде есірткі саудасы мен даркнет алаңдарына қатысы бар 4 мыңнан астам криптоәмиянға талдау жүргізілген.

Жұмыстың қорытындысында жалпы құны 9,7 миллион доллардан асатын цифрлық активтер бұғатталып, оның 3,2 миллион доллары тәркіленіп, мемлекет кірісіне өткізілген.

Агенттік бұл қаражаттың қылмыстық жолмен алынғанын нақты дәлелденгенін атап өтті. Операция нәтижесінде есірткі жеткізу арналары тоқтатылып, тарату жүйесінің инфрақұрылымы жойылған. Сонымен бірге бірқатар интернет-дүкендердің қызметі толықтай тоқтатылған.