Астанада «Заң мен тәртіп» қағидаты аясында қала әкімінің орынбасары Ерік Мейірханның төрағалығымен нашақорлық пен есірткі бизнесіне қарсы іс-қимыл жөніндегі ведомствоаралық штабтың отырысы өтті, -деп хабарлайды «Dalamedia» ақпараттық порталы. Жиында бірінші тоқсанның қорытындысы шығарылып, алдағы міндеттер талқыланды.

Полиция департаменті есірткі қылмысына қарсы басқармасының бастығы Мақсат Абикеннің айтуынша, есірткінің 90%-ы байланыссыз тәсілмен сатылады. Сондықтан онлайн-арналарды анықтауға басымдық беріліп, 562 есірткі сайты бұғаттауға жіберілді, күмәнді операциялары бар 378 карта бұғатталды. Жалпы 369 оқиға анықталып, оның 125-і сату фактісі. Заңсыз айналымнан 45 кг 521 гр есірткі, оның ішінде 15 кг «синтетика» тәркіленді. Есірткіні жарнамалау бойынша 4 іс қозғалып, 75-тен астам граффити өшірілді. «Күлдіргіш газға» қатысты 20 қылмыстық іс ашылып, 70-тен астам баллон тәркіленді.

Ерік Мейірхан жазғы демалыс қарсаңында жастар арасында ақпараттық-түсіндіру жұмысын күшейтуді тапсырды. Спорттық және киберспорттық іс-шаралар аясында есірткіге қарсы ауқымды акциялар өткізу ұсынылды. Сонымен қатар есірткі жасырушылар мен граффити салушыларды анықтау үшін IT-технологияларды дамыту қажеттігі айтылды. Отырыста мектеп оқушылары мен студенттерді еңбекке тарту, қоғамдық көлік жүргізушілерін жүйелі тестілеуден өткізу мәселелері де қаралды.