Шымкентте азық-түлікті үйден шықпай-ақ алдыруға мүмкіндік беретін жаңа сервис іске қосылды. Freedom SuperApp экожүйесіне кіретін «Азық-түлік» қызметі қала тұрғындарына тауарды жылдам жеткізіп қана қоймай, болашақта дрон арқылы тасымалдауды да көздейді, ,-деп хабарлайды «Dalamedia» ақпараттық порталы.

Жоба таныстырылған жабық шараға БАҚ өкілдері мен блогерлер қатысып, сервистің жұмысымен танысты. Көзге бірден түскені – қойма ішіндегі қарбалас тіршілік. Мұнда әр процесс уақытпен есептеледі. Қоймада 20 мыңнан астам тауар түрі бар. Оның ішінде күнделікті азық-түлік, балаларға арналған өнімдер, тұрмыстық заттар мен сусындар толық қамтылған.

Өнім сапасын сақтау үшін қойма бірнеше температуралық аймаққа бөлінген. Жеміс-жидек пен көкөніске арнайы ылғалдылық режимі қарастырылса, ет пен сүт өнімдері -20°C-қа дейінгі мұздатқыштарда сақталады. Ал +2 мен +8°C аралығындағы бөлмелерде тез бұзылатын тауарлар орналастырылған. Шымкенттің аптап ыстығын ескеріп, сусындарды салқын күйде жеткізу үшін бөлек аймақ та жасақталған.

Қойма директоры Рустам Орозалиевтің айтуынша, сервис тұрғындарға нарықта сирек кездесетін өнімдерді ұсынуды мақсат етеді. Қазір жеткізудің екі түрі бар: тапсырысты 60 минут ішінде экспресс түрде алуға немесе өзіңізге ыңғайлы уақытты таңдауға болады. Бір қызметкер бір мезетте бірнеше тапсырысты 10-15 минут ішінде жинайды. Жоба іске қосылған сәттен бастап күніне 200 тапсырыс қабылданып жатыр.

Ал сервистің бас директоры Руслан Погорелов бұл бастаманың тек саудамен шектелмейтінін атап өтті. Оның сөзінше, жаңа қойма – қосымша жұмыс орындары мен жергілікті кәсіпкерлерге мүмкіндік. Қазірдің өзінде мұнда 120-дан астам адам еңбек етеді. Компания жергілікті наубайханалармен, фермерлермен және шағын өндіріс орындарымен серіктестік орнатуды көздейді. Болашақта олардың өнімін тек Шымкентте ғана емес, басқа қалаларға да шығармақ.

Жоба авторлары алдағы уақытта қызмет аясын кеңейтуді жоспарлап отыр. Биыл тағы төрт қалада осындай сервис іске қосылса, келесі жылы оның географиясы он қалаға дейін ұлғаймақ.