Қазақстанда 2026 жылдан бастап eGov жүйесінде құжаттарды дауыспен рәсімдеуге мүмкіндік беретін жаңа сервис іске қосылады, — деп хабарлайды «Dalamedia» ақпараттық порталы.

Бұл туралы жасанды интеллект және цифрлық даму вице-министрі Дмитрий Мун мәлімдеді. Оның айтуынша, алдағы уақытта қазақстандықтар қажетті қызметті алу үшін өтінішті тек дауыстап жеткізсе жеткілікті. Қалғанын AlemGPT деп аталатын жасанды интеллект жүйесі атқарады.

Вице-министрдің сөзінше, бұл жүйе қажетті қызметті таңдап, құжатты рәсімдеу үдерісін толық автоматты түрде жүргізеді. Жоба арнайы суперкомпьютерде, жабық желіде жұмыс істейді және қазақ тілін түсінетін үлкен тілдік модельге негізделген. Осылайша, мемлекеттік қызмет көрсету барысында адам факторы мүлде болмайды.

Сонымен қатар, Дмитрий Мун eGov Mobile қосымшасындағы жасанды интеллект кеңесшісі қазірдің өзінде азаматтарға қызметтерді қазақ және орыс тілдерінде түсінуге көмектесіп жатқанын атап өтті. Оның айтуынша, онлайн-нотариус бейне байланыс арқылы шамамен 19 мың мәміле жасаған. Ал ЖИ-терапевт еліміздегі 38 клиникада сынақтан өтіп жатыр.

Жалпы алғанда, вице-министрдің дерегінше, 8,7 миллион мемлекеттік қызмет проактивті форматта көрсетілген. Қазір мұндай 45-тен астам қызмет түрі бар, олар мемлекеттік органдармен бірлесіп жетілдіріліп келеді.