Шымкент қаласында жоспардан тыс тексеріс барысында базарларда “Coca-Cola” брендімен қолдан жасалған салқын сусындар сатылғаны белгілі болды,-деп хабарлайды «Dalamedia» ақпараттық порталы.

Тексеруді “The Coca-Cola Company” компаниясының ресми өтінішінен кейін басталған. Компания құқықтарының бұзылғанын және дүкендерде шығу тегі күмәнді өнімдердің пайда болғанын мәлімдеген.

Қала базарларында жүргізілген тексеріс кезінде ірі көлемдегі контрафактілік сусындар анықталып, олардың қолдан жасалған белгілері мен таңбалау талаптарының сақталмағаны, сондай-ақ тиісті рұқсат құжаттарының жоқ екені белгілі болған.Аталған дерек бойынша Әкімшілік құқықбұзушылық туралы кодекстің 158-бабы бойынша іс қозғалып, материалдар сотқа жолданды.

Мамандардың айтуынша, контрафактілік өнімдер тек құқық иелеріне зиян келтіріп қана қоймай, санитарлық талаптардың сақталмауына байланысты тұтынушылардың денсаулығына да қауіп төндіруі мүмкін.

Шымкент қалалық әділет департаменті кәсіпкерлерді заңсыз тауар айналымына жол бермеуге шақырып, мұндай тексерістердің алдағы уақытта да жалғасатынын ескертті.