Елдегі ірі бизнес қауымдастықтар «AMANAT» партиясының кәсіпкерлер қанатына біріге бастады. Бұл туралы Мәжіліс төрағасы, партия жетекшісі Ерлан Қошанов Кәсіпкерлік мәселелері жөніндегі үйлестіру кеңесінің кеңейтілген отырысында мәлімдеді, -деп хабарлайды «Dalamedia» ақпараттық порталы.

Жиынға мыңдаған компанияны біріктіретін салалық қауымдастықтар мен бизнес өкілдері қатысты. Кездесуде партия мен кәсіпкерлердің ел экономикасын дамыту, жаңа мүмкіндіктер ашу және халық табысын арттыру жолында бірлесе жұмыс істейтіні айтылды. Отырысқа өңірлердегі филиалдар да онлайн форматта қосылды.

Ерлан Қошанов соңғы жылдары мемлекет басшысы қалыптастырып жатқан жаңа басқару үлгісі әділдікке, экономикалық өсімге және кәсіпкерлікті қолдауға бағытталғанын атап өтті. Оның айтуынша, референдум арқылы қабылданған Конституция бұл бағытты нақтылай түсті. Осыған орай партия мен бизнес өкілдерінің ортақ мақсаты – әділетті әрі дамыған Қазақстан құру.

Партия төрағасы кәсіпкерлермен байланысты күшейту үшін арнайы кәсіпкерлер қанатын құруды ұсынды. Ол бизнес өкілдері партияны сенімді серіктес ретінде қабылдап, өз мәселелерін ашық жеткізе алуы тиіс екенін айтты.

Қошановтың сөзінше, партия жанындағы үйлестіру кеңесі осы уақытқа дейін кәсіпкерлердің мәселелерін көтеретін тиімді алаңға айналған. 30-дан астам отырыста 190-ға жуық мәселе қаралып, оның ішінде қаржыландыру, салық және инфрақұрылымға қатысты түйткілдер талқыланған. Кеңес жұмысына Премьер-Министрдің орынбасары – Ұлттық экономика министрі Серік Жұманғарин де белсенді қатысып келеді.

Өңірлерде де осындай кеңестер жұмыс істейді. Алдағы уақытта олар жергілікті бизнестің негізгі проблемаларын жинақтап, мемлекеттік органдармен бірлесіп шешуге күш салмақ. Қажет болған жағдайда мәселелер республикалық деңгейге шығарылады. Белсенді кәсіпкерлер партияның кадрлық резервіне енгізіледі.

Сонымен қатар партия бизнеске қолдау көрсететін цифрлық құралдарды дамытуды қолға алған. Жақын уақытта «Ashyk Amanat» аналитикалық платформасы іске қосылып, кәсіпкерлердің мәселелерін жүйелі түрде талқылауға мүмкіндік береді.

Мәжілістегі партия фракциясы да кәсіпкерлікті қолдауға бағытталған заңдарды жетілдіруге басымдық беріп отыр. Бұл жұмыс «Атамекен» ұлттық кәсіпкерлер палатасымен бірлесіп жүргізілуде.

Жаңа кәсіпкерлер қанаты аясында депутаттар бизнес өкілдерімен тұрақты байланыс орнатып, олардың ұсыныстарын заңнамалық деңгейде ілгерілетуге атсалысады.

Жиын барысында Серік Жұманғарин кәсіпкерлердің өтініштері тек жекелеген мәселелерді шешумен шектелмей, жүйелі өзгерістерге ұласуы керектігін айтты.

Кездесу қорытындысында бірқатар ірі бизнес және шағын кәсіп өкілдері партия қатарына қабылданды. Олардың қатарында түрлі қауымдастық жетекшілері мен компания басшылары бар. Сондай-ақ бизнес өкілдеріне мемлекет басшысының алғыс хаттары мен партиялық марапаттар табысталды.