Мемлекеттік кеңесші Ерлан Қарин жастарға әскери-патриоттық тәрбие беру жөніндегі республикалық үйлестіру кеңесінің отырысына қатысты. Бұл туралы Ақорданың баспасөз қызметі хабарлады.

Қорғаныс министрлігі жанындағы кеңес отырысында Оқу-ағарту министрі Жұлдыз Сүлейменова, Ғылым және жоғары білім министрі Саясат Нұрбек, Мәдениет және ақпарат вице-министрі Евгений Кочетов, сондай-ақ Абай және Қостанай облыстарының әкімдері баяндама жасады. Жиында Мемлекет басшысының әскери-патриоттық тәрбиеге қатысты бастамаларын іске асыру барысы талқыланды.

Ерлан Қарин желтоқсан айының басында Президент Қасым-Жомарт Тоқаев Қарулы күштер мен өзге де құрылымдардағы әскери және құқықтық тәртіп мәселелері бойынша жиын өткізгенін еске салды. Сол кездесуде заңдылықты сақтау мен әскердегі тәрбие жұмысын жетілдіруге бағытталған нақты тапсырмалар берілгенін атап өтті.

Аталмыш басқосуда мемлекеттік кеңесші әскери-патриоттық тәрбие саласындағы негізгі басымдықтарды айқындады. Атап айтқанда, бұл бағыттағы жұмыстарға жалпыұлттық құндылықтарды енгізу, жастарды әскерге шақыру тәсілдерін жаңарту, Қорғаныс министрлігі мен қоғам арасындағы байланыс тетіктерін күшейту, орталық және жергілікті атқарушы органдардың ортақ іс-қимыл жоспарын әзірлеу маңызды екенін айтты. Сонымен қатар ардагерлер ұйымдарымен өзара жұмысты жандандыру, әскери оқу орындары мен жастар қозғалыстарының әлеуетін арттыру және 2026 жылы өтетін «Айбын» әскери-патриоттық жиынын мазмұнды өткізуге мән беру қажеттігін атап өтті.

Жиын қорытындысы бойынша Ерлан Қарин мемлекеттік органдарға нақты тапсырмалар беріп, әскери-патриоттық тәрбие саласындағы жұмысты жүйелі әрі жауапкершілікпен жүргізу керектігін ескертті.