Қазақстан Президенті Жоғары Еуразиялық экономикалық кеңестің отырысында Еуразиялық экономикалық одақтың даму бағыттарына қатысты бірқатар маңызды бастамаларды көтерді.

Мемлекет басшысының айтуынша, 2025 жылы ЕАЭО-ға мүше елдердің жиынтық ішкі жалпы өнімі 2 пайызға өседі. Одақ құрылған сәттен бері мүше мемлекеттердің бір-біріне салған тікелей инвестиция көлемі 20 миллиард доллардан асты.

Президент ЕАЭО қызметіне жасанды интеллект технологияларын енгізуді ұсынып, жүк тасымалы кезіндегі жасанды шектеулерді жою мен шекарадағы кезектерді қысқарту қажеттігін атап өтті. Сондай-ақ Қазақстан халықаралық мультимодальды логистика орталықтары мен терминалдар желісін дамытуға белсенді кіріскенін айтты.

Бұдан бөлек, Еуразия даму банкінің есебіне сәйкес, ЕАЭО елдерінің өнеркәсіптік экспорт әлеуеті 67 миллиард долларға бағаланып отыр, ал оны толық іске асырған жағдайда жалпы нәтиже 500 миллиард долларға дейін жетуі мүмкін.

Мемлекет басшысы Қазақстанның 2026 жылы ЕАЭО-ға төрағалығы аясында Еуразия экономикалық форумын өткізетінін мәлімдеді. Келесі Жоғары Еуразиялық экономикалық кеңестің отырысы 28–29 мамырда Астанада өтеді.