Агенттік мәліметінше, “Qyran” кешеніндегі жылжымайтын мүлік сату желеуімен азаматтардың қаражатын заңсыз иемдену схемасы ұйымдастырылған. Сату кеңсесінде сатып алушыларға компанияның объектілерге меншік құқығын “дәлелдейтін” макеттер, техникалық паспорттар және түрлі сенімхаттар ұсынылған. Клиенттерге пәтер, коммерциялық нысан және паркинг орындарын нарықтан төмен бағамен алу мүмкіндігі көрсетіліп, мәмілелердің заңды екені айтылған.

Алайда нақты сатып алу-сату шарттарының орнына күдіктілер заңды күшке ие болмайтын брондау және алдын ала келісімдер жасаған. Бұл құжаттар тіркеуге жатпайды және меншік құқығын бермейді. Жәбірленушілер төлемді қолма-қол немесе күдіктілердің жеке шоттарына аударған. Ал бұл операциялар компанияның бухгалтерлік құжаттарында көрсетілмеген. Осылайша азаматтардан 3,8 млрд теңгеден астам қаржы жымқырылған.

Тергеу барысында күдіктілердің екінші алаяқтық схеманы да жүзеге асырғаны анықталды. Олар құрылыс компаниясының атынан жалған сатып алу-сату шарттарын рәсімдеп, жылжымайтын мүлікке меншік құқықтарын тіркеген. Бірақ сатудан түскен қаражат компания кассасына түспеген. Нәтижесінде 76 нысан сатылымынан 4,1 млрд теңге заңсыз айналымға түскен.

Барлық шығын сомасы – 7,9 млрд теңге.

Сот санкциясымен 94 пәтерге, 51 паркинг орнына, 8 коммерциялық үй-жайға және бір автокөлікке тыйым салынды. Үш күдікті қамауға алынды. Қылмыстық процестік кодекстің 201-бабына сәйкес өзге мәлімет жарияланбайды.