Шығыс Қазақстан облысында қалалық көшелерді күтіп-ұстауға бөлінген бюджет қаражатының ірі көлемде жымқырылғаны анықталды. Бұл туралы Қаржы мониторингі агенттігі хабарлады.

ҚМА-ның ШҚО бойынша департаменті «Таза Өскемен» коммуналдық мемлекеттік кәсіпорнының бұрынғы басшылығына қатысты сотқа дейінгі тергеп-тексеруді жүргізіп жатыр.

Тергеу деректеріне сәйкес, 2022–2023 жылдары кәсіпорынның бұрынғы директоры, оның орынбасары және жеке кәсіпкер өз лауазымдық өкілеттіктерін пайдалана отырып, мемлекеттік сатып алу рәсімдерін айналып өтіп, бюджет қаржысын өздерімен байланысы бар компаниялардың есепшоттарына жүйелі түрде заңсыз аударған.

Қаржы мониторингі агенттігі хабарлағандай, қылмыстық схеманың мәні – материалдарды жеткізу және арнайы техниканы жалға алу бойынша жалған құжаттар рәсімдеуде болған. Құжаттарда жолдарды жөндеуге арналған битум мен құм сатып алу, суды соруға арналған техника жалдау және бұған дейін орнатылған 23 аялдама павильонына материал алу туралы жалған деректер көрсетілген.

Заңсыз аударылған қаржы жеке кәсіпкер арқылы қолма-қол ақшаға айналдырылып, кейін схемаға қатысушылар арасында бөлінген.

Жалпы келтірілген залал сомасы 120 миллион теңгеден асқан. Тергеу барысында күдіктілердің қылмыстық табысқа сатып алған Өскемен қаласындағы элиталық тұрғын үйдегі пәтеріне, BMW X6M және Subaru Forester автокөліктеріне, сондай-ақ жер учаскелеріне сот санкциясымен тыйым салынды.

Кәсіпорынның бұрынғы директоры екі ай мерзімге қамауға алынды. Тергеу амалдары жалғасуда.