Қаржы мониторингі агенттігінің Алматы қаласы бойынша департаменті «Amir Capital» компаниясына қатысты қылмыстық істі тергеп жатыр. Тергеу деректеріне сәйкес, өзін халықаралық инвестициялық қор ретінде таныстырған ұйым үш жыл бойы Қазақстан, Беларусь, Ресей және Қырғызстан азаматтарынан қаржы тартқан.

Компания 5–10% көлемінде ай сайынғы табысқа уәде беріп, қаражатты криптовалюта саудасына, майнингке және түрлі жобаларға инвестициялау арқылы көбейтетінін айтқан. Инвесторлар ресми сайттағы реферальды сілтемелер арқылы тіркеліп, жеке кабинеттерін USDT, BTC және ETH секілді криптовалюталармен толықтырған.

Агенттік мәліметінше, қаржы классикалық пирамида принципімен бөлінген: бұрынғы салымшыларға төлемдер кейінгі қатысушылардың қаражаты есебінен жүргізілген. Осылайша, жобаға 40-тан астам адам тартылған.

2021 жылдың соңына қарай инвесторлар «amir.capital» платформасынан қаражаттарын шығара алмай қалған. Ұйымдастырушылар мәселені «техникалық ақаумен» түсіндіріп, төлемдердің қайта басталатынын айтқанымен, салымшылар қаражаттарына қол жеткізе алмаған.

Сот шешімімен құны 10 млн АҚШ долларынан асатын криптоактивтер мен Алматы облысындағы жер теліміне бұғат қою санкциясы берілді. Күдіктілердің бірі екі айға қамауға алынған.

Тергеу жалғасып жатыр. ҚР Қылмыстық-процестік кодексінің 201-бабына сәйкес қосымша мәлімет жария етілмейді.