Арнайы операция барысында 54 жастағы ер адам мен оның 26 жастағы ұлы ұсталған. Тергеу мәліметінше, әкесі баласын қылмыстық іске тартып, есірткі дайындауды өзі үйреткен. Тінту кезінде 200 келі мефедрон, 2 тоннадан астам прекурсор, химиялық реакторлар мен түрлі зертханалық жабдықтар тәркіленді.

Мамандардың айтуынша, алынған заттар шамамен 600 мың реттік дозаға жетеді. Оның «қара нарықтағы» құны 5 миллиард теңгеден асады. Сонымен қатар прекурсорлардың бір бөлігі еліміздің басқа өңірлеріне жөнелтіліп отырғаны анықталған.

ІІМ өкілдері бұл қылмыстық тізбектің толық жойылғанын мәлімдеді. Ведомство дерегінше, есірткі өндірісін ұйымдастырғандарға заң бойынша өмір бойына дейін бас бостандығынан айыру жазасы қарастырылған.