Түркістан облысында темекі өнімдерін (снюс) заңсыз дайындау және тарату фактілері анықталды. Қаржылық мониторинг агенттігінің облыстық департаменті Келес және Ордабасы аудандарында үш жасырын өндіріс цехын анықтап, оларды тоқтатқан.

500 шаршы метрден асатын нысандарда 20-ға жуық азамат жұмыс істеген. Өнімдер еліміздің барлық өңіріне жеткізілген.

Тексеріс барысында тәркіленген заттар арасында: 1 миллионнан астам дайын өнім, 30 тонна темекі, 2 миллион қаптама пакеті, түрлі хош иістендіргіштер, улы химиялық қоспалар және өндірістік жабдықтар бар. Агенттік мамандарының айтуынша, бұл шамамен 60 миллион бір реттік снюс өндіруге жетеді. Сонымен қатар заңсыз табыс арқылы алынған екі автокөлікке сот санкциясымен тыйым салыныпты.

Қаржылық мониторинг агенттігі снюс құрамында никотин мен улы химиялық заттар бар екенін, олар тәуелділік тудыруы мүмкін екенін және денсаулыққа, оның ішінде ауыз қуысына және жүрек-қантамыр жүйесіне әсер етуі мүмкін екенін ескертеді.