Сидней қаласындағы жағажайда болған атысқа қатысты шетелдік бұқаралық ақпарат құралдары күдіктілердің жеке деректерін жариялады. БАҚ мәліметінше, оқиғаға қатысы бар екі адам – жергілікті тұрғындар, әкесі мен ұлы екен. Алайда бұл ақпаратты Австралия полициясы әзірге ресми түрде растаған жоқ.
Жарияланған деректерге сүйенсек, күдіктілер 24 жастағы Навид Акрам және оның 50 жастағы әкесі Саджид Акрам болуы мүмкін. Оқиға орнында Навид Акрам полиция тарапынан ұсталған, ал оның әкесі құқық қорғау органдары жүргізген операция кезінде оққа ұшқан.
Тінту барысында күдіктілерден төрт бірлік атыс қаруы – винтовкалар мен аңшы мылтықтары тәркіленген. Бұдан бөлек, олардың тұрғылықты мекенжайынан тағы екі қару табылған. БАҚ-тың хабарлауынша, Саджид Акрам соңғы он жыл бойы қару ұстауға ресми лицензия иеленген.
Сондай-ақ, Навид Акрам бұған дейін Австралияның қауіпсіздік және барлау қызметінің (ASIO) назарында болғаны айтылады. Ол террористік топтармен ықтимал байланысы бар деген күдікпен алты ай бойы тексерілген, алайда тергеу оның тарапынан зорлық-зомбылық қаупі жоқ деген қорытынды жасап, іс тоқтатылған.
Еске сала кетейік, Сидней қаласындағы көпшілік жиі баратын Бонди жағажайында Ханука мерекесі өтіп жатқан сәтте белгісіз үш адам халыққа оқ жаудырған еді. Қарулы шабуыл салдарынан 16 адам қаза тауып, 38 тұрғын түрлі деңгейде жарақат алды. Олардың 29-ы медициналық мекемелерге жеткізілді.