Қарағанды қаласында колледж студенті есірткі заттарын заңсыз таратқаны үшін 15 жылға бас бостандығынан айырылды. Бұл туралы Қаржы мониторинг агенттігі хабарлады.

Тергеу деректеріне сәйкес, студент «Telegram» мессенджері арқылы белгісіз куратормен байланыс орнатып, «жасырма-курьер» және «қойма» рөлдерін атқаруға келіскен. Оның міндетіне берілген координаттар бойынша есірткі заттарын алу, сақтау, бөліп орау, тасымалдау және қала аумағында жасырын орындарға орналастыру кірген. Күдікті тәулігіне шамамен 30 жасырма жасаған.

Сондай-ақ сотталушы Таиландтан Қазақстанға халықаралық пошта арқылы есірткі жеткізуді ұйымдастырған. Ол бұл үшін «Telegram» арқылы 400 мың теңге сыйақыға кәмелетке толмаған дропперді тартқан. Жөнелтілім дроппердің атына рәсімделіп, ол тауарды алу кезінде ұсталды. Тексеру барысында 909 грамм каннабис экстракты тәркіленген.

Тінту кезінде күдіктінің тұрғылықты жерінен қосымша 80 грамм есірткі заты табылып, айғақ ретінде алынды. Бұдан бөлек, ұялы телефонды тексеру барысында оның бір күн бұрын бірнеше жасырма орналастырғаны анықталды. Берілген координаттар бойынша тағы 3,34 грамм каннабис экстракты тәркіленді.

Сот үкімімен айыпталушы 15 жылға бас бостандығынан айырылды. Үкім әзірге заңды күшіне енген жоқ.