Қазіргі уақытта «Әуежай» стансасынан «Нұрлы жол» стансасына дейінгі аралықта пойыздар мен инфрақұрылымға кешенді тексерістер жүргізілуде. Мамандар әрбір элементтің техникалық талаптарға сәйкестігін бағалап, қозғалыстың қауіпсіздігін қамтамасыз етуге бағытталған сынақтарды жүзеге асыруда.

Сынақ барысында пойыздар жобада көрсетілген ең жоғары жылдамдық – 80 км/сағ деңгейіне жетті. Бұл көрсеткіш жүйенің техникалық мүмкіндіктерінің талапқа толық сәйкес екенін көрсетті. Сонымен қатар, қозғалысты басқару, байланыс және дабыл жүйелері де тексеруден өтіп, олардың қалыпты режимде дұрыс жұмыс істейтіні расталды.

Мамандар атап өткендей, мұндай сынақтар LRT желісінің қауіпсіз әрі сенімді жұмысын қамтамасыз ету үшін маңызды кезең болып табылады. Сынақ нәтижелері бойынша алынған мәліметтер жүйені одан әрі жетілдіруге, техникалық кемшіліктерді дер кезінде анықтап түзетуге мүмкіндік береді.

Жүйенің толық іске қосылуы Астанадағы қоғамдық көлік инфрақұрылымын жаңартып, қала тұрғындары мен қонақтарына ыңғайлы әрі жылдам көлік қызметін ұсынуды қамтамасыз етеді. LRT жобасы қаладағы заманауи транзит жүйесінің маңызды бөлігі болып саналады және оның қауіпсіздігіне ерекше көңіл бөлінуде.