Астанада жеңіл рельсті көлік (LRT) жүйесін көктем мезгілінде іске қосу жоспарланып отыр,-деп хабарлайды «Dalamedia» ақпараттық порталы.

Бұл туралы қала әкімі Жеңіс Қасымбек Премьер-министрдің орынбасары Роман Склярмен бірге LRT депосындағы бірыңғай диспетчерлік орталықтың жұмыс дайындығын тексеру барысында мәлімдеді.

Қазіргі таңда LRT желісіндегі станциялар мен пойыздар кезең-кезеңімен сынақтан өтіп жатыр. Әкімнің айтуынша, барлық техникалық жүйелер тексеріліп, қауіпсіздік талаптарына ерекше назар аударылуда. Сынақ жұмыстары аяқталғанға дейін қозғалыс толықтай бақылауда болады.

Сонымен қатар, пойыздардың қозғалысы толығымен пилотсыз режимде жүзеге асады. Яғни, құрамдар автоматтандырылған басқару жүйесі арқылы қатынайды. Бұл қалалық көлік қозғалысының қауіпсіздігін арттырып, адам факторына тәуелділікті азайтуға мүмкіндік береді.

Жеңіс Қасымбектің айтуынша, LRT жүйесін нақты іске қосу күні барлық сынақ жұмыстары толық аяқталғаннан кейін жарияланады. Қазір мамандар диспетчерлік басқару орталығының жұмысын, пойыздардың қозғалыс алгоритмін және станциялардағы инфрақұрылымды тексеріп жатыр.

Айта кетейік, LRT жобасы қаладағы қоғамдық көлік жүйесін дамытуға, жолаушылар ағынын азайтуға және қозғалысты жеңілдетуге бағытталған. Жоба іске қосылғаннан кейін елорда тұрғындары мен қонақтары үшін қатынау мүмкіндігі кеңейе түспек.