Алматы метросында түтін мен күйік иісінің шығуына байланысты бір бағыттағы сапар уақытша тоқтатылды. Бұл туралы Төтенше жағдайлар министрлігі хабарлады.

Ведомствоның мәліметінше, метрополитен диспетчерінен «Абай» станциясында қысқа тұйықталу болғаны жөнінде ақпарат түскен. Оқиға орнына ТЖД күштері мен құралдары жедел түрде жіберілген.

Тексеру барысында ашық жану белгілері анықталмаған. Метрополитен өкілдерінің айтуынша, машинист қауіпсіздік талаптарына сай жылжымалы құрамды тоқтатып, жолаушыларды түсірген. Кейін пойыз техникалық тексеру жүргізу үшін депоға жөнелтілген.

Қала әкімдігі де бұл ақпаратты растап, пойыздың тексеруге алынғанын мәлімдеді. Қазіргі уақытта метро штаттық режимде жұмыс істеп тұр.