Семей қаласында еліміздің тарихында тұңғыш рет қала әкімі тікелей сайлау арқылы анықталды. Дауыс беру нәтижесінде Семейдің жаңа әкімі болып Әділет Нұрсағатұлы Қожанбаев сайланды.

Қаланың сайлаушылар тізіміне 220 761 азамат енгізілген. Оның 118 553-і өз таңдауларын жасаған. 2 482 бюллетень жарамсыз деп танылып, 4 310 адам «бәріне қарсы» дауыс берген.

Нәтижесінде Әділет Қожанбаевқа 89 441 сайлаушы сенім білдірген. Қалған үміткерлер - Бекжасаров А.К. 9 763 дауыс, Төлеуов К.М. 12 557 дауыс жинады.

Абай облыстық аумақтық сайлау комиссиясының мәліметінше,

«Семей қаласының әкімі болып 1980 жылы туған, Абай облысы Көкпекті ауданының әкімі, өзін-өзі ұсынған Қожанбаев Әділет Нұрсағатұлы сайланды».

Бұған дейін ол Көкпекті ауданының әкімі қызметін атқарған, сондай-ақ Семей қаласы әкімінің орынбасары болған.

12 қазанда өткен бұл сайлау - облыс орталығы деңгейіндегі әкімді тікелей сайлау тәжірибесінің алғашқы қадамы болды. Науқанды ұйымдастыруға барлығы 129 сайлау комиссиясы (1 аумақтық және 128 учаскелік) қатысқан.