Мадридтің атақты «Реалы» Алматыға «Қайратпен» өтетін тарихи матчқа келді. Корольдік клуб футболшылары бес жұлдызды InterContinental Almaty қонақүйіне жайғасты. БАҚ дерегінше, «Реал» нысанды толықтай жалға алып қойғандықтан, мұнда қазір бөлме брондау мүмкін емес.

Қазақстанға келген құрамда Килиан Мбаппе, Винисиус Жуниор, Джуд Беллингем сынды әлемдік жұлдыздар бар. Қауіпсіздік шаралары күшейтіліп, қонақүйдің бірнеше қабаты жабылды. Кіреберісте күзет қойылған.

Жанкүйерлер түннің бір уағына қарамастан өз кумирлерін әуежайдан қарсы алды. Ал қонақ үйдің алдына тіптен аншлаг жиналған. Сағат түнгі 00:50-де ұшып келген команданы қолына тулар мен плакаттар ұстаған мыңдаған адам күтіп тұрды. Әлеуметтік желілерде футболшылардың сәнді киіммен автобусқа бет алған сәтінен жүздеген бейнеролик тарады.

«Қайрат» пен «Реал Мадрид» арасындағы кездесу 30 қыркүйекте Алматыдағы Орталық стадионда өтеді. Ойын 21:45-те басталады. Билеттер түгел сатылып кеткен, қалада арнайы фан-аймақтар дайындалып жатыр.

Бұл – «Реалдың» еурокубоктардағы ең алыс сапары саналады.