Жолаушылардың көптеп түскен шағымынан кейін Ақтөбе - Маңғыстау бағытындағы пойыз вагондары жаңартылды. Бұл туралы Көлік министрлігі мәлімдеді.

Аталған бағытта бұған дейін жеке тасымалдаушы «Otpan Logistik» ЖШС қызмет көрсеткен. Алайда вагондардың техникалық жағдайына қатысты наразылықтар мен жылжымалы құрамды жаңарту жөніндегі міндеттемелердің орындалмауына байланысты компаниямен келісімшарт бұзылған.

Қазіргі таңда жолаушылар тасымалы ұлттық тасымалдаушы - «Жолаушылар тасымалы» АҚ пойыздарымен жүзеге асырылып жатыр. Пойыз отандық өндірісте жасалған жаңа вагондармен қамтамасыз етілген. Құрамында 5 купе және 6 плацкарт вагоны бар, бір бағыттағы сыйымдылығы 400-ден аса жолаушыға есептелген.

Жаңа вагондар заманауи қауіпсіздік және жайлылық талаптарына сай. Купелерде жеке жарық шамдары, USB-порттар мен электр розеткалары орнатылған. Сондай-ақ ерекше қажеттілігі бар жолаушылар үшін арнайы купелер қарастырылған.

Министрлік әлеуметтік маңызы бар бағыттарда жолаушылар қатынасын тұрақты қамтамасыз ету және пойыз паркін кезең-кезеңімен жаңарту жұмыстары жалғасатынын атап өтті.