2025 жылдың басынан бері әлеуметтік инспекторлар еліміз бойынша 1 371 тексеру жүргізіп, нәтижесінде ондаған заңбұзушылықты анықтады. Тексеру қорытындысы бойынша 79,7 млн теңгеден астам сомаға айыппұл салынды.
Еңбек және халықты әлеуметтік қорғау министрлігінің мәліметінше, жүргізілген тексерулердің 466-сы жоспардан тыс, 558-і профилактикалық бақылау аясында, ал 347-сі прокуратураның талабы негізінде өткен. Нәтижесінде анықталған кемшіліктерді жою үшін 704 нұсқама беріліп, 349 әкімшілік айыппұл салынған.
Мемлекеттік бақылау әртүрлі саладағы нысандарды қамтыды. Атап айтқанда, мемлекеттік және квазимемлекеттік ұйымдар, денсаулық сақтау, білім беру, әлеуметтік қорғау, мәдениет, спорт, көлік инфрақұрылымы, қоғамдық тамақтану, сауда және қаржы қызметін көрсету нысандары тексерілген.
Осы шаралар аясында Шығыс Қазақстан облысында ерекше назар қозғалысы шектеулі азаматтарға қолайлы орта қалыптастыруға аударылды. Облыс прокуратурасының бастамасымен дене шынықтыру және спорт басқармасына қарасты 10 нысанға жоспардан тыс тексеру жүргізіліп, қолжетімділік талаптарының сақталуы бағаланған. Тексеру нәтижесінде жауапты тұлғалар әкімшілік жауапкершілікке тартылды.
– Соңғы жылдары қала инфрақұрылымында оң өзгерістер байқалады. Мүгедектігі бар адамдар үшін әлеуметтік маңызы бар нысандар әлдеқайда қолжетімді бола бастады. Бұл күнделікті өмірді жеңілдетіп, қызметтерді еркін алуға мүмкіндік береді, – дейді Өскемен қаласының тұрғыны, І топ мүгедегі Айнұр Қалиева.
Айта кетейік, бұған дейін Алматы қаласында да әлеуметтік инспекторлардың тексерулерінен кейін мүмкіндігі шектеулі азаматтар үшін бірқатар қолайлы жағдай жасалғаны хабарланған болатын.
DALAMEDIA admin
7
0