Астана қаласында Қазақстан Республикасы Парламенті Сенатының депутаты Бибігүл Жексенбай «Қазаэронавигация» республикалық мемлекеттік кәсіпорнының еңбек ұжымымен кездесу өткізді. Кездесу жалпыұлттық референдум қарсаңында Жаңа Конституция жобасын түсіндіру мақсатында ұйымдастырылды.

Кездесу барысында сенатор аэронавигация саласының ел экономикасы мен халықаралық көлік байланыстары үшін стратегиялық маңызына тоқталды.

«Қазаэронавигация» РМК Қазақстан Республикасының әуе кеңістігінде ұшулардың қауіпсіздігі мен тұрақтылығын қамтамасыз етеді. Кәсіпорын әуе қозғалысын басқару, ұшақтардың ұшу және қонуын қызмет көрсету, транзиттік рейстерді сүйемелдеу, радиотехникалық құралдарды пайдалану, метеорологиялық және аэронавигациялық ақпарат ұсыну сияқты маңызды функцияларды жүзеге асырады. Бүгінде салада 4 мыңға жуық жоғары білікті маман – диспетчерлер, инженерлер, техниктер, метеорологтар және IT мамандары еңбек етеді.

Сенатордың айтуынша, Қазақстан аумағының кеңдігі мен географиялық орналасуы еліміздің әуе кеңістігін Еуропа мен Азия арасындағы маңызды транзиттік дәліздердің біріне айналдырып отыр. Жыл сайын Қазақстанның әуе кеңістігі арқылы ондаған мың транзиттік рейстер өтеді. Бұл көлік логистикасының дамуына, өңірлердің өзара байланысына, инвестициялық тартымдылыққа, туризмнің дамуына және еліміздің халықаралық беделіне тікелей әсер етеді.

Кездесу барысында Бибігүл Жексенбай Конституциялық өзгерістердің стратегиялық инфрақұрылым салаларының дамуына әсеріне тоқталды.

«Ұсынылып отырған Конституциялық өзгерістер мемлекетті басқарудың жаңа институционалдық моделін қалыптастыруға бағытталған. Бұл – заң үстемдігін нығайту, билік тармақтарының жауапкершілігі мен ашықтығын арттыру деген сөз. Ал авиация сияқты стратегиялық салалар үшін бұл құқықтық тұрақтылықты, реттеу жүйесінің болжамдылығын және инфрақұрылымдық инвестициялардың қорғалуын білдіреді», – деді сенатор.

Сондай-ақ ол саладағы технологиялық жаңғыртудың маңыздылығына тоқталды. Аэронавигация жүйесінің дамуы әуе қозғалысын басқарудың цифрлық жүйелерін енгізумен, радионавигациялық кешендерді жаңартумен, авиациялық жүйелердің киберқауіпсіздігін күшейтумен және жоғары білікті мамандар даярлаумен тығыз байланысты екені атап өтілді.

Сенатордың айтуынша, алдағы жылдары Қазақстан аэронавигациясының алдында әуе кеңістігінің өткізу қабілетін арттыру, транзиттік әлеуетті күшейту, әуе қозғалысын басқару процестерін толық цифрландыру және халықаралық авиациялық стандарттарға толық сәйкестікке қол жеткізу сияқты маңызды міндеттер тұр.

Кездесу соңында Бибігүл Жексенбай алдағы референдум елдің саяси жүйесін жаңғырту мен мемлекеттің тұрақты дамуы үшін берік құқықтық негіз қалыптастырудағы маңызды қадам екенін атап өтті.

«Күшті әуе кеңістігі – күшті мемлекетті талап етеді. Ал тұрақты және тиімді авиация жүйесі заманауи әрі берік Конституциясыз мүмкін емес», – деді сенатор.

Сондай-ақ сенатор кәсіпорын қызметкерлерін азаматтық белсенділік танытып, алдағы референдум жұмысына белсенді қатысуға шақырды.

«Референдум – әрбір азаматтың ел болашағына өз үнін қосатын маңызды мүмкіндік. Дауыс беруге қатысу – Қазақстанның дамуына, мемлекетіміздің тұрақтылығына және жаңғыру жолына жауапкершілікпен қараудың көрінісі», – деп атап өтті Бибігүл Жексенбай.

Кездесу барысында қатысушылар саланың даму перспективалары, кадр даярлау және Қазақстанның Еуропа мен Азия арасындағы сенімді авиациялық транзиттік хаб ретіндегі рөлін нығайту мәселелерін талқылады.