Үндістандық IndiGo әуе компаниясы халықаралық рейстердің бір бөлігін, оның ішінде Алматыға ұшатын бағыттарды уақытша тоқтатты. Бұл шешім Иран әуе кеңістігіндегі қауіпсіздік жағдайына байланысты қабылданған.

Әуе компаниясының хабарлауынша, 26, 27 және 28 қаңтарға жоспарланған рейстер орындалмайды. Осыған байланысты Пхукет – Мумбай – Алматы бағытымен ұшқан қазақстандық туристер Мумбай әуежайында қалып қойған. Жолаушылар Мумбайға қонғаннан кейін Алматыға ұшатын рейстердің тоқтатылғанын білген. Соның салдарынан олар әуежайдың транзиттік аймағында екі тәулік бойы күтуге мәжбүр болған.

Туристердің айтуынша, әуе компаниясы рейстердің тоқтатылатынын алдын ала білгенімен, оларды Пхукеттен ұшаққа отырғызған. Әуежайда жолаушыларға қажетті жағдай толық жасалмаған: берілген тағам балаларға жарамсыз болған, қонақүй ұсынылмаған, транзиттік аймақтан шығуға рұқсат берілмеген.

Қазір жолаушыларға басқа рейстерге өз қаражатына билет сатып алу ұсынылып отыр. Алайда билеттердің бағасы өте қымбат. Мысалы, Мумбайдан Дубайға ұшу шамамен 1,2 миллион теңге, ал Бангкокқа билет құны 800 мың теңгеге жуық.

IndiGo әуе компаниясының өкілдері жолаушыларға 27 қаңтардың кешіне дейін күтуді ұсынып отырғанын хабарлаған.

Еске салайық, бұған дейін Иран әуе кеңістігі арқылы ұшуға бірқатар әуе компанияларына шектеу қойылған еді.