Мюнхеннен Бейжіңге бағыт алған Lufthansa әуе компаниясының лайнері Алматы халықаралық әуежайына шұғыл қонуға мәжбүр болды. Бұған халықаралық рейстің бортында жолаушының кенеттен денсаулығы сыр беріп, қайтыс болуы себеп болған.

Қайғылы оқиға бүгін, LH 0722 рейсінде орын алды. Қазақстанның авиациялық әкімшілігінің хабарлауынша, ұшақ қонған бойда бортқа әуежайдың медициналық қызметі мен қалалық жедел жәрдем бригадасы шұғыл жіберілген. Алайда дәрігерлер жолаушының әуеде қайтыс болғанын анықтады.

Сондай-ақ, полиция департаментінің мәліметінше, марқұм шет мемлекеттің азаматы болып шықты. Мамандардың айтуынша өлімге жедел жүрек жеткіліксіздігі себеп болуы мүмкін. Қазіргі уақытта Алматы қаласының әуежайындағы желілік полиция бөлімі аталған факт бойынша қылмыстық іс қозғап, тиісті тергеу амалдарын жүргізуде.

Төтенше жағдайға байланысты Алматыға аялдаған әуе кемесі жанармай құйып, таңғы сағат 07:56-да межелі бағыты бойынша Бейжіңге ұшып кетті.