Сенатор Бибигүл Жексенбай депутаттық сауалында мәдениет пен өнер саласын дамытудағы жүйелі мәселелерді көтерді. Астана қаласындағы мәдениет ұйымдары ұжымдарымен кездесуде кадр тапшылығы, материалдық-техникалық базаның ескіргені және сала қызметкерлерінің әлеуметтік қорғалмауы негізгі түйткілдер ретінде айтылған.

Сауалда мәдениеттің елдің рухани, зияткерлік әлеуетін және халықаралық беделін қалыптастырудағы маңызы ерекше атап өтілді. Алайда саланың стратегиялық рөліне қарамастан, заманауи мамандықтарды енгізу, техникалық стандарттарды жаңарту, инклюзия және шығармашылық мамандарға арналған әлеуметтік кепілдіктер институционалдық деңгейде толық реттелмеген.

«Мемлекет басшысы V Ұлттық құрылтайда өнер мен мәдениет – ұлттың рухани коды екенін, ал мемлекеттің өркениеттілік деңгейі оның мәдениетке деген көзқарасымен өлшенетінін атап өтті. Осыған байланысты мәдениет саласын қосалқы емес, орнықты мемлекеттік дамудың өзегі ретінде қарастыру қажет. Кездесулер барысында бірқатар өзекті мәселелер анықталды. Қазіргі таңда цифрлық контент продюсерлері, сахналық цифрлық технологиялар инженерлері, инклюзивті мәдениет мамандары, мәдени деректер талдаушылары сияқты жаңа мамандықтар заңнамалық деңгейде бекітілмеген.

Сонымен қатар елордадағы театрлар, концерттік ұйымдар мен филармонияларда жарық және дыбыс жүйелері ескірген, цифрлық трансляция мен мұрағаттау мүмкіндіктері шектеулі, халықаралық гастрольдер мен бірлескен жобаларға техникалық дайындық төмен. Мүгедектігі бар азаматтардың өнерге қатысуы мен инклюзивті мәдени ортаны дамыту ісі жүйелі мемлекеттік қолдауға ие болмай отыр.

Балет және цирк өнері өкілдерінің әлеуметтік әрі кәсіби қорғалуы жеткіліксіз, сондай-ақ дирижерлердің құқықтық мәртебесі мен әлеуметтік кепілдіктері де толық айқындалмаған», – деді сенатор.

Осыған байланысты Бибигүл Жексенбай Үкіметке бірқатар институционалдық шешімдерді қарастыруды ұсынды. Атап айтқанда:

• заманауи мәдени және цифрлық мамандықтарды заңнамалық тұрғыда бекіту;
• дирижерлер үшін құқықтық және әлеуметтік кепілдіктер енгізу;
• мәдениет ұйымдарына арналған ең төменгі ұлттық техникалық стандарттарды белгілеу;
• инклюзивті мәдени ортаны тұрақты қаржыландыру арқылы дамыту;
• балет және цирк өнері өкілдерін әлеуметтік қорғау және кәсіби қайта даярлау шараларын іске асыру.