Алматыда LRT желісінің алғашқы кезеңін салуға қатысты қоғамдық талқылау материалдары жарияланды. Экологтар жоба бойынша бірқатар кемшіліктерді атап өтті, – деп хабарлайды «Dalamedia» ақпараттық порталы.

Ұзындығы 18,3 шақырым болатын алғашқы желі Алатау ауданындағы индустриялық аймақты Алматы-2 теміржол вокзалымен байланыстырадыҚұрылыс жұмыстарын 2027 жылдың сәуірінде басталып, 2029 жылдың сәуірінде аяқтау жоспарланған.

Желінің бағыты Бауыржан Момышұлы және Төле би көшелері арқылы өтіп, Абылай хан даңғылымен «Райымбек батыр» көлік-транзиттік торабына дейін жалғасады. Жоба аясында 34 жолаушылар платформасы қарастырылған. LRT «Дарабоз», «Нұркент», «Ғажайып», «13» шағын аудандарын және бірнеше тұрғын үй кешенін қаланың орталығымен байланыстырады. Бас жобалаушы – «Метропроект» ЖШС.

Экология департаменті құжаттарға талдау жасап, сегіз негізгі ескерту енгізген. Атап айтқанда, құрылыс және технологиялық жұмыстар кезінде пайда болатын зиянды шығарындылар толық негізделмегені, ауа сапасына әсері жеткілікті бағаланбағаны айтылған. Сондай-ақ су пайдалану есептері нақтыланбаған.

Мамандар трассаның Есентай мен Үлкен Алматы өзендерімен қиылысуына байланысты алаңдаушылық білдірді. Жобада су қорғау аймақтарын сақтау мен судың ластану қаупіне қатысты толық талдау жоқ. Бұдан бөлек, жасыл желекке келетін зиян, құрылыс қалдықтарының нақты көлемі, шу мен дірілдің әсері де толық есептелмеген.

Жарияланған материалдарда анықталған ескертулердің қашан түзетілетіні көрсетілмеген. Қала әкімдігінің жол инфрақұрылымын дамыту басқармасы LRT бағыты бекітілгенін және өзгертілмейтінін мәлімдеді. Жоба жеке инвестициялар есебінен жүзеге асырылмақ, ал жол ақысының мөлшері кейін анықталады.

Ведомствоның мәліметінше, LRT қаланың бірыңғай көлік жүйесінің бір бөлігі болады. Болашақта ол метро, BRT, автобус және басқа да көлік түрлерімен біріктіріліп, жолаушылардың қозғалысын жеңілдетуге бағытталады.