Үндістанның Калькутта қаласында аргентиналық футбол жұлдызы Лионель Мессимен кездесу барысында стадионда тәртіпсіздік орын алды. Оқиға сегіз дүркін «Алтын доп» иегерінің коммерциялық тур аясында Vivekananda Yuvabharati Salt Lake Stadium аренасына келуі кезінде тіркелді.
Кездесуге бірнеше мың жанкүйер жиналған. Алайда ұйымдастырудағы кемшіліктер мен стадионның шамадан тыс толуы жағдайды ушықтырды. Куәгерлердің айтуынша, Мессидің алаңды айналып шығуы жоспарланғанымен, қауіпсіздік себептерімен ол жүзеге аспай, футболшы алаңда небәрі 10 минуттай ғана болған.
Мессидің ерте кететіні белгілі болған соң, трибуналарда наразылық күшейіп, жанкүйерлер бөтелкелер лақтырып, жарнамалық қалқандарды бүлдірген.
Кейін Батыс Бенгалия штатының бас министрі Мамата Банерджи орын алған жағдайға байланысты Мессиден және жанкүйерлерден кешірім сұрап, іс-шараны ұйымдастыру бойынша тексеріс жүргізілетінін мәлімдеді.