Испан басылымдарының хабарлауынша, мадридтік «Реал» Алматыдағы Орталық стадионның газон жағдайына наразы болып, УЕФА-ға ресми түрде өтініш түсірген. Клуб ұйымдастырушылардан алаңдағы шөпті қысқартуды талап еткен.

Okdiario дерегінше, алаңдағы шөптің ұзындығы шамамен 25 миллиметрді құраған. Ал «Реал» футболшылары әдетте 20–22 миллиметрлік газонда ойнайды. Испаниялық клуб бұл айырмашылық ойын қарқыны мен пас беру жылдамдығына кері әсер етеді деп есептеген.

Дегенмен, УЕФА шағымды қанағаттандырған жоқ. Өйткені регламент бойынша газон биіктігі 30 миллиметрге дейін рұқсат етіледі. Яғни Алматыдағы алаң талапқа толық сәйкес болған.

Айта кетейік, шөптің ұзындау болуы доптың қозғалысын баяулатады. Мұндай жағдай көбіне техникалық мүмкіндігі төменірек командаларға тиімді саналады.

Бүгін, 30 қыркүйекте, Орталық стадионда «Қайрат» – «Реал» кездесуі өтеді. Бұл – алматылық клубтың Чемпиондар лигасы топтық кезеңіндегі алғашқы үй ойыны, ал мадридтіктер үшін Қазақстандағы дебюттік матч болмақ.