Колумбияның Кали қаласында өтіп жатқан жасөспірімдер арасындағы ауыр атлетикадан әлем чемпионатында қазақстандық Нұржан Жұмабай алтын медаль жеңіп алды, -деп хабарлайды «Dalamedia» ақпараттық порталы.

15 жастағы зілтемірші 88 келіге дейінгі салмақ дәрежесінде бақ сынап, қос сайыс қорытындысында 348 келі көтеріп, қарсыластарынан оқ бойы озық шықты. Ол жұлқа көтеруде 155 келіні, ал серпе көтеруде 193 келіні еңсерді.

Нұржан Жұмабай серпе көтеру жаттығуында 193 келіні бағындырып, өз жас санатындағы әлем рекордын жаңартты.

Бұл салмақта Испания өкілі Эрик Гуадамуд Пико 344 келімен күміс жүлдеге ие болса, Мексика спортшысы Хосе Орландо Мантилья 335 келі нәтижемен үшінші орынға тұрақтады.

Айта кетейік, бұл – Нұржан Жұмабайдың жасөспірімдер арасындағы әлем чемпионатындағы алғашқы жарысы. Бұған дейін ол 2025 жылы 17 жасқа дейінгі Азия чемпионатында 79 келіге дейінгі салмақта топ жарып, серпе көтеруде 175 келіні еңсеріп, Азия рекордын жаңартқан болатын.