Қазақстанның даңқты боксшысы Геннадий Головкиннің есімі Халықаралық бокс даңқы залына салтанатты түрде енгізілді, ,-деп хабарлайды «Dalamedia» ақпараттық порталы.

Нью-Йорк штатындағы Канастота қаласында өткен рәсімде қазақстандық спортшы кәсіби бокс тарихындағы ең беделді қауымдастықтардың бірінің мүшесі атанды. Осылайша Геннадий Головкин Қазақстан тарихында Халықаралық бокс даңқы залына қабылданған алғашқы боксшы ретінде ел спортының шежіресіне енді.

Халықаралық бокс даңқы залы Головкиннің спорттағы елеулі жетістіктерін жоғары бағалап, оны өз дәуірінің ең үздік боксшыларының бірі ретінде тағы бір мәрте мойындады. Ол бұл мәртебеге алғаш мүмкіндік туған сәтте-ақ ие болды. Енді оның есімі әлемдік бокс тарихында өшпес із қалдырған Мұхаммед Әли, Майк Тайсон, Флойд Мейвезер және Мэнни Пакьяо секілді саңлақтардың қатарында тұр.

Головкиннің бұл құрметке лайық деп танылуына оның ұзақ жылдар бойы көрсеткен жоғары нәтижелері негіз болды. Әуесқой бокста ол 350 жекпе-жектің 345-інде жеңіске жетіп, Қазақстан құрамасының көшбасшыларының бірі болды. Сондай-ақ халықаралық жарыстарда ел намысын абыроймен қорғады.

Кәсіпқой рингте де қазақстандық былғары қолғап шебері орта салмақтағы ең мықты чемпиондардың біріне айналды. Оның еншісінде 45 жекпе-жек пен 42 жеңіс бар, оның 37-сін мерзімінен бұрын аяқтады. Әр жылдары WBA, WBC, IBF және IBO тұжырымдары бойынша әлем чемпионы атанып, The Ring журналының белбеуін иеленді.

Геннадий Головкиннің жекпе-жектері әрдайым көрермен қызығушылығын тудырып, миллиондаған жанкүйердің назарын өзіне аударды. Оның шабуылға құрылған жарқын мәнері мен жойқын соққылары әлемдік бокстың ең танымал спортшыларының қатарына қосылуына жол ашты.