Қазақстанның әйгілі кәсіпқой боксшысы, Олимпиада ойындарының күміс жүлдегері Геннадий Головкин АҚШ-та өтетін Халықаралық бокс Даңқ залына қабылдау рәсіміне қатысу үшін Нью-Йорк штатына барды, -деп хабарлайды «Dalamedia» ақпараттық порталы.

ESPN мәліметінше, салтанатты шара 11-14 маусым аралығында Нью-Йорк штатындағы Канастота қаласында өтеді. Бұл рәсімде Геннадий Головкинге Халықаралық бокс Даңқ залының мүшесі мәртебесі ресми түрде табысталады.

Осылайша, Головкин аталған ұйымның қатарына енген алғашқы қазақстандық кәсіпқой боксшы атанып отыр. Бұған дейін Даңқ залына әлемдік бокстың ірі тұлғалары Мұхаммед Әли, Майк Тайсон, Флойд Мейвезер, Мэнни Пакьяо, сондай-ақ Костя Цзю, Виталий Кличко және Владимир Кличко қабылданған болатын.

2025 жылғы дауыс беру қорытындысы бойынша Геннадий Головкинмен бірге Вернон Форрест пен Стив Коллинс те Даңқ залының жаңа мүшелері қатарына қосылды. Дауыс беруге АҚШ, Жапония, Англия, Канада, Аргентина, Австралия, Нидерланд, Германия және Мексикадан келген спорт журналистері мен бокс тарихын зерттеушілер қатысты.

Геннадий Головкин кәсіби мансабында орта салмақта WBA, IBF және WBC тұжырымдары бойынша чемпиондық белбеулерін ұзақ уақыт бойы сәтті қорғап, жанкүйерлерге есте қаларлық жекпе-жектер сыйлады. Оның соңғы айқасы 2022 жылы мексикалық Сауль Альвареске қарсы өтіп, төрешілер шешімімен қарсыласының пайдасына аяқталған еді.