Қазақстандық бокс аңызы Геннадий Головкин Халықаралық бокс Даңқ залына (IBHOF) енген алғашқы қазақстандық спортшы атанды. Бұл туралы ұйымның ресми хабарламасында жарияланды.

IBHOF-қа енгізу рәсімі 2026 жылдың 11–14 маусымында АҚШ-тың Нью-Йорк штатындағы Канастота қаласында өтеді.

2025 жылғы дауыс беру қорытындысы бойынша Головкинмен бірге Вернон Форрест пен Стив Коллинс те кандидаттар қатарында болды. Дауыс беруге АҚШ, Жапония, Ұлыбритания, Канада, Аргентина, Аустралия, Нидерланд, Германия және Мексикадан келген жетекші спорт журналистері мен бокс тарихшылары қатысты.

Головкин Даңқ залына алғашқы мүмкіндіктен-ақ өтіп, ерекше жетістікке жетті. Сонымен қатар биылғы тізімге әлемнің бұрынғы чемпиондары Антонио Тарвер (2024 жылдан бастап номинант) және Найджел Бенн (2017 жылдан бастап номинант) де енгізілетін болды.

Айта кетейік, әр жылдары бокс тарихындағы ұлы есімдер — Мұхаммед Әли, Майк Тайсон, Флойд Мейвезер, Мэнни Пакьяо, сондай-ақ Костя Цзю (2011), Виталий Кличко (2018) және Владимир Кличко (2021) — осы Даңқ залына қабылданған.

Еске сала кетейік, бұған дейін Геннадий Головкин World Boxing ұйымының президенті болып тағайындалған еді.