Қазақстандық кәсіпқой боксшы Жәнібек Әлімханұлы допинг дауына байланысты уақытша шеттетілгеніне қарамастан, чемпиондық белбеулерін сақтап қалды, – деп хабарлайды «Dalamedia» ақпараттық порталы.

World Boxing Organization шешіміне сәйкес, боксшы 2025 жылғы 2 желтоқсаннан бастап 2026 жылдың соңына дейін шаршы алаңнан уақытша шеттетілді. Сонымен қатар ұйым оның чемпиондық белбеулерін өзінде қалдыру туралы шешім шығарған. Шешім жарияланғаннан кейін Әлімханұлы жанкүйерлеріне алғыс айтып, желтоқсанда рингке қайта оралатынын мәлімдеді.

WBO-ның тәртіптік комитеті спортшының бұған дейін антидопинг талаптарын бұзбағанын және ынтымақтастық танытқанын ескергенін айтты. Бұл алғашқы жағдай болғандықтан, шешімге оң әсер еткен. Енді ол 2026 жылдың соңында шаршы алаңға қайта оралып, уақытша чемпиондық белбеу иесімен жекпе-жек өткізуі тиіс.

Айта кетейік, Жәнібек Әлімханұлы 2025 жылдың желтоқсанында WBA чемпионы Эрисланди Ларамен үш бірдей титулды біріктіру жекпе-жегіне шығуы керек болған. Алайда Voluntary Anti-Doping Association жүргізген тексеру барысында оның сынамасынан мельдоний анықталып, жекпе-жек өтпей қалды. Кейін боксшының командасы қайта тексеруге өтініш беріп, «B» сынамасы да оң нәтиже көрсеткен еді.