Президент Мишустиннің Шымкентте өтетін Еуразиялық үкіметаралық кеңес отырысы мен Цифрлық форумға қатысуы Қазақстан мен Ресей байланысының ерекше деңгейін көрсететінін айтты. Сондай-ақ екіжақты экономикалық ынтымақтастықтың нақты нәтижелері сөз болды: жалпы құны 25 миллиард долларға жуық 122 ірі жоба жүзеге асқан, ал сауда айналымы 30 миллиард долларға жақындаған. Мемлекет басшысының сөзінше, Ресей – Қазақстанның негізгі сауда-экономикалық әрі инвестициялық серіктестерінің бірі.

Кездесу барысында Ресей Президенті Владимир Путиннің Қазақстанға жоспарланған мемлекеттік сапарына дайындық мәселесі де назардан тыс қалған жоқ. Қасым-Жомарт Тоқаев бұл сапарды екі ел арасындағы әріптестікті жаңа деңгейге көтеретін маңызды кезең ретінде бағалап, әзірлік аясында көпсалалы ынтымақтастық жан-жақты пысықталғанын жеткізді.

Өз кезегінде Михаил Мишустин көрсетілген сый-құрмет үшін алғыс айтып, Президентті жалпыұлттық референдумның сәтті өтуімен және жаңа Конституцияның қабылдануымен құттықтады. Ол Ресей Президенті Владимир Путиннің ыстық сәлемін жеткізіп, алдағы сапарға дайындық жұмыстары үкімет деңгейінде мұқият жүргізіліп жатқанын айтты. Оның сөзінше, мемлекеттер басшылары жүктеген міндеттер кезең-кезеңімен орындалып келеді.