Қазақстан Президенті Қасым-Жомарт Тоқаев Пәкістанның The News International газетіне берген сұхбатында АҚШ Президенті Дональд Трамптың саясатына жоғары баға беріп, халықаралық қатынастарда прагматикалық әрі реалистік тәсілдің маңызын атап өтті,-деп хабарлайды «Dalamedia» ақпараттық агентігі.

Мемлекет басшысы Трампты «тегеурінді әрі көреген көшбасшы» деп сипаттап, оның ұлттық мүддені бірінші орынға қоятын бағытын қолдайтынын айтты. Президенттің айтуынша, АҚШ-тағы экономикалық өсім мен әлеуметтік саладағы реформалар осы саясаттың нәтижесін көрсетіп отыр. Қасым-Жомарт Тоқаев Қазақстанда да «Заң және тәртіп» қағидатын орнықтыру басты мақсат екенін жеткізді.

Сұхбат барысында Президент Қазақстан мен Пәкістан арасындағы ынтымақтастыққа да тоқталды. Ол Пәкістанды стратегиялық серіктес әрі халықаралық аренада беделі жоғары мемлекет ретінде бағалап, екі ел арасындағы сауда-инвестициялық байланыстарды кеңейтуге үлкен мүмкіндік бар екенін айтты. Мемлекет басшысының сөзінше, көлік-логистика, ауыл шаруашылығы, өнеркәсіп, денсаулық сақтау және білім беру салалары өзара әріптестіктің негізгі бағыттары саналады.

Сондай-ақ, Қасым-Жомарт Тоқаев өңіраралық байланысты дамыту мәселесіне ерекше мән беріп, Қазақстан–Түрікменстан–Ауғанстан–Пәкістан көлік дәлізінің стратегиялық маңызын атап өтті. Бұл бағыт Оңтүстік Азия нарығына шығуға жол ашатынын айтты.

Президент Қазақстанның Ибраһим келісімдеріне қосылуын да түсіндірді. Оның пікірінше, бұл бастама бейбітшілік пен халықаралық диалогты нығайтуға бағытталған және елге инвестиция мен озық технология тартуға мүмкіндік береді. Сонымен қатар Қазақстан Израильмен де, Палестина халқымен де теңгерімді саясат ұстанатынын жеткізді.

Газа секторына қатысты Мемлекет басшысы ұзақ мерзімді бейбітшілікке тек екі мемлекет қағидатына негізделген саяси шешім арқылы қол жеткізуге болатынын айтты. Ал Ресей мен Украина арасындағы қақтығысқа қатысты Қазақстанның ұстанымы өзгермейтінін, мәселе тек келіссөздер арқылы шешілуі тиіс екенін атап өтті.

Сұхбатта Қазақстандағы конституциялық реформаларға да тоқталған Президент елдің «суперпрезиденттік» модельден бас тартып, билік тармақтары арасындағы тепе-теңдікке негізделген жаңа жүйеге өткенін айтты. Оның сөзінше, бұл өзгерістер «Әділетті Қазақстанды» құруға бағытталған.

Мемлекет басшысы Қазақстанның стратегиялық мақсаты – әділ, қауіпсіз, таза және озық мемлекет қалыптастыру екенін атап өтіп, елді Еуразиядағы басты транзиттік хабқа айналдыру, экономиканы әртараптандыру және цифрлық технологияларды кеңінен енгізу жоспарын айтты.