Ақорда мәліметінше, әңгіме барысында екі ел басшылары алдымен Ораза айт пен Наурыз мерекелерімен құттықтасып, бір-біріне жылы лебіздерін жеткізген.

Сондай-ақ Режеп Тайип Ердоған Қазақстандағы жалпыұлттық референдумның табысты өткенін атап өтіп, жаңа Конституцияның қабылдануымен құттықтаған. Оның айтуынша, бұл өзгерістер елдің дамуына жаңа серпін береді.

Өз кезегінде Қасым-Жомарт Тоқаев референдумға түрік байқаушыларының белсенді қатысқаны үшін алғыс айтып, мұны екі ел арасындағы бауырластық байланыстың айғағы ретінде бағалаған.

Кездесу барысында Түркия президенті биыл 14 мамырда Қазақстанға жоспарланған мемлекеттік сапарына ерекше мән беретінін жеткізді. Осы сапар аясында жоғары деңгейдегі Стратегиялық ынтымақтастық кеңесінің отырысы және Түркі мемлекеттері ұйымының бейресми саммиті өтеді деп күтілуде.

Қазақстан президенті бұл келіссөздердің екі ел арасындағы стратегиялық әріптестікті нығайтуда маңызды рөл атқаратынын атап өтті. Сондай-ақ Түркістанда өтетін түркітілдес елдер басшыларының кездесуінен үлкен үміт күтетінін білдірді.

Әңгіме соңында Режеп Тайип Ердоған Қасым-Жомарт Тоқаевты сәуір айында Анталияда өтетін дипломатиялық форумға қатысуға шақырып, Қазақстан президенті бұл ұсынысты қабыл алды.