Мемлекет басшысы Қасым-Жомарт Тоқаев Қазақстан халқын қасиетті Рамазан айының басталуымен құттықтап, бұл кезеңнің мұсылман қауымы үшін айрықша рухани мәнге ие екенін атап өтті, – деп хабарлайды «Dalamedia» ақпараттық порталы.

Президенттің айтуынша, Рамазан – адамды рухани тазаруға, жақынына жанашыр болып, мейірім мен қамқорлық танытуға үндейтін ерекше уақыт. Ораза ұстау арқылы азаматтар сабыр мен төзімділікті шыңдап, қарапайымдылық, жауапкершілік және адалдық секілді асыл қасиеттерді бойына сіңіреді.

Мемлекет басшысы қазіргі әлемдегі күрделі жағдайды ескере отырып, Рамазанның мәнін терең түсініп, оның рухани құндылықтарын саналы түрде қабылдау – шынайы имандылықтың көрінісі екенін атап өтті.

Мемлекет басшысы өз құттықтауында еліміздің ауқымды жаңғыру кезеңіне қадам басқанына тоқталды. Республикалық референдумға ұсынылған жаңа Конституция жобасы мемлекеттің әділет пен тұрақты даму жолындағы бағытын айқындайды. Негізгі заң елдің саяси, азаматтық және экономикалық институттарын жетілдіруге, сондай-ақ адам құқықтарын қорғау жүйесін күшейтуге мүмкіндік бермек.

Сонымен қатар Мемлекет басшысы дәстүрлі рухани-мәдени құндылықтарды сақтай отырып, заң үстемдігі, тәртіп, тазалық, әділдік пен отаншылдыққа негізделген жаңа қоғамдық сананы қалыптастыру маңызды екенін жеткізді. Бұл ұстанымдар қасиетті Рамазанның тағылымымен өзара үйлеседі.

Президенттің пікірінше, білім мен ізгілікке ұмтылған қоғамда Рамазан айы ерекше рухани маңызға ие болып, барша жұртқа береке мен игілік әкеледі.

Мемлекет басшысы мұсылман қауымын қасиетті аймен құттықтап, елге тыныштық пен амандық тіледі.