Орталық референдум комиссиясының дерегінше, дауыс беру құқығына ие 12 482 613 азаматтың 9 127 192-сі немесе 73,12 пайызы референдумға қатысқан. Олардың 7 954 667-сі (87,15%) жаңа Конституцияны қолдап дауыс берсе, 898 099 адам қарсы шыққан. Ал 146 558 бюллетень жарамсыз деп танылған.

Комиссия төрағасы Нұрлан Әбдіровтің айтуынша, дауыс беруге қатысқан азаматтардың үлесі жартысынан асқандықтан, референдум өтті деп есептеледі. Сонымен қатар ел өңірлерінің басым бөлігінде қатысушылардың көпшілігі қолдау білдіргендіктен, жаңа Конституция қабылданды деп танылды.