Қазақстанда жаңа Конституция жобасын мақұлдау бойынша республикалық референдумның қорытындысы жарияланды, — деп хабарлайды «Dalamedia» ақпараттық порталы.

Еуразиялық интеграция институтының мәліметінше, 2026 жылғы 15 наурыздағы референдум барысында Қазақстанның 17 облысы мен Астана, Алматы, Шымкент қалаларында азаматтарға учаскелерден шыққан бойда сауалнама жүргізілді. Барлығы 200 учаске қамтылды. Оның 129-ы қалаларда, 71-і ауылдық жерлерде орналасқан. Сауалнамаға 30 мың респондент қатысып, арнайы даярланған интервьюерлер face-to-face әдісімен сұхбат жүргізген.

Күні бойы жеті рет аралық қорытындылар жасалды: сағат 9.00, 10.30, 12.30, 14.30, 16.30, 18.30 және 20.30-да. Респонденттерге: «Сіз жаңа Конституцияны қабылдайсыз ба?» — деген сұрақ қойылды.

Экзитпол нәтижесіне сәйкес, сауалнамаға қатысқандардың 86,7%-ы «Иә, қабылдаймын» деп жауап берген. Жалпы дауыс беруге қатысу деңгейі 75,3%-ды құраған.

Сонымен қатар жеке «Социс-А» кешенді әлеуметтік зерттеулер институтының мәліметінше, дауыс берген респонденттердің 87,4%-ы жаңа Конституцияны қолдаған. Зерттеу 200 учаскеден шыққан азаматтар арасында жүргізілген.

Ал «AMANAT» партиясының «Қоғамдық саясат институты» жүргізген exit-poll нәтижесі бойынша, дауыс бергендердің 88,6%-ы жаңа Конституцияны мақұлдаған.