Қазақстандағы 2026 жылғы республикалық референдум аясында шетелде де дауыс беру ұйымдастырылды. Бұл жолы 54 мемлекетте 71 учаске жұмыс істеп тұр, – деп хабарлайды «Dalamedia» ақпараттық порталы.Бұл туралы Қазақстан Сыртқы істер министрінің орынбасары Арман Исетов мәлімдеді.

Министрліктің дерегінше, шетелде дауыс беру құқығына ие қазақстандықтардың саны 14 380 адамды құрайды. Дауыс беру Астана уақытымен таңғы сағат 03:00-де Токио мен Сеул қалаларында басталды. Сағат 08:00-ге дейін 23 учаске ашылып, 198 азамат өз таңдауын жасап үлгерген.

Ал ең соңғы болып ашылатын учаске Сан-Франциско қаласында орналасқан. Мұнда дауыс беру Астана уақытымен 15 наурыз күні сағат 19:00-де басталып, 16 наурызда таңғы 08:00-де аяқталады.

Сыртқы істер министрлігінің мәліметінше, дауыс берушілер саны туралы ақпарат түске дейін әр екі сағат сайын, ал түстен кейін әр сағат сайын жаңартылып отырады.