Шетелде жүрген Қазақстан азаматтары жаңа Конституция жобасына қатысты республикалық референдумда дауыс бере бастады, – деп хабарлайды «Dalamedia» ақпараттық порталы.

Алғашқылардың бірі болып Қазақстанның Сеул мен Токио қалаларындағы елшіліктері жанынан ашылған учаскелер есігін айқара ашты. Жергілікті уақыт бойынша таңғы сағат 07:00-де басталған дауыс беру науқанына шетелдегі қазақстандықтар белсенді қатысуда.

Токио қаласындағы учаскеде алғашқылардың қатарында «Нихон» университетінің 3-курс студенті Жібек Айдын дауыс берді. Оның айтуынша, референдумға қатысу – әр азаматтың ел алдындағы жауапкершілігін көрсететін маңызды қадам.

Ал Сеулдегі учаскеде алғаш болып дауыс бергендердің бірі – Орман шаруашылығы саласындағы Азия ынтымақтастық ұйымының (AFoCO) қызметкері Ернар Сәрсенбаев. Ол да референдумға қатысу ел болашағына бейжай қарамайтын әр азамат үшін маңызды екенін атап өтті.